Wat is Oostfräisk Plat?

Dat Oostfräisk Plat (kört: Oostfräisk) is ‘n tóól, däi in Oostfräisland proot’t word’t. Oostfräisk is fan d’ tóólklassifikóósje nóó ‘t stamboommoodel fan August Schleicher ‘n warjant fan dat Leeğdüütsk, wat föör ‘n groot däil fan däi morfooloogii un ‘n reelóótiif groot däil fan däi woordskat ook stemmen daajt.

Man Oostfräisland wur eerst nóó dat middeloller leeğdüütsktóólerğ. Leeğdüütsk is as fröem tóól koomen un mus sük lóóterweğ as folkstóól undwikkeln un eetóbläären.

Däi wellenteejoorii fan Hugo Schuchardt móókt dat tóólbiiskriiven diffeerensäärter. Däi êerst wäel is dat Leeğdüütsk, dat däi fräisk oortóól in ‘t Oostfräisland bol häilmóóls ooverlóógert het. Dat Fräisk dee siin spooren d’r bii f’râal in d’ substróótwoorden un in d’ foonooloogii achterlóóten. Däi twäied wäel is dat Hollandsk, dat stâark inflaud up däi woordskat fan ‘t Oostfräisk Plat haar. Däi dâard wäel biistaajt uut âal däi roomóónsk woorden, däi oover ’t Hollandsk, Düütsk of diirekt uut ‘t Fransk in ‘t Oostfräisk koomen bünt.
Däi färd un läest wäel is dat Düütsk, wat fandóóeğ döör däi tweitóólerğkaid fan Oostfräisland f’rallen däi woordskat fan dat Oostfräisk Plat döör läinwoorden un interfeerensen biiinflaud’t.

Dat Oostfräisk Plat is alsoo ‘n buent kuntakttóól un daajt in däi praksis as ‘n äigenstóónderğ tóól funksjenäären. Dat Oostfräisk het fär grôot djóólekten, däi sük äits döör ‘n luudferskuuven unnerskäident un tauhôop dat Oostfräisk Plat bildent.